Lungawi Daan Ka Thiam Zo!

Leitlun minung tamsawn cu lungkim daan thiam lo, lungawinak caang thiam lo kan si. Nun lungawi le hnangam duh ah a phunphun ih talbuai kan si. Paul cun nun lungkim daan a zir ngah thu thawnginn sung ihsin a ngan. Nun lungkimnak a zir ngahmi hi, a saya Gamaliel hnen ihsin siloin, Jesuh Khrih hnen ihsin asi. 
 
Minung nunnak ih thil tamsawn cu sumpai ih lei theih lomi an si. Sivai cu kan lei thei nan harhdamnak ngaingai cu sumpai ih lei theih asilo. Upattlak sinak khal a lei ih lei theih asilo. Zumnak tla lei a theihlo. Sumpai duhnak in tawk le diriam ti a neilo. Sumpai hawlnak hrang caan tamsawn kan hman ahcun nuam tete in Pathian kan zumnak cu kan fehsan ding tinak asi. (1Tim 6:10). 
 
Zumtu hrang ahcun kan neihmi ih lungkim hi, thlawsuah thilri kan donmi parih lungkim thiam hnakin, Jesuh Khrih kan co ngahmi parih lungkim daan zir ngah ding sawn hi asi (Heb 13:5). Hlan Christian pawl khal neihmi neilo in ram kip ah an tlan nan, an neihmi ah lungawi dingin Paul cun arak sim. Cucu Jesu Khrih an neih mi hi asi.
 
David in Pathian a neih ruangah tlaksammi nei in a ruat aw lo. Jesuh khalin kan nunnak hrangah donhar lo dingin thu in pe. Donhar ih kan umnak in kan nun kan sau bet ter thei lo. Pathian ih thu sungih um sawn kan zuam dingmi asi. Pathian thawn pehzomnak tha kan neih lawngah nun lungawinak le nun diriamnak kan nei ding. Leitlun thil tampi buaipi hnakin van lam thu ruatin van ah kan hlawnthil khawl sawn ding kan si.   
 
Milian pa hnenah, a neihmi zuarin mifarah a pek hnu ah thlun dingin a fial. A va duh awm lo ve! Ro thilri duhnak, neihnak hin Pathian rinsannak cu a dem ter rori ko! Asinan, nuhmeinu sawn cun, a neihmi zaten pe in nitin Jesuh thawn fehtlang nun neih a hril sawn.   
 
Tampi neih ih buai hnakin malte neih ih Pathian tihzah a tha sawn. Farah tuk khal a tul lo ih lian tuk khal a tulnak a um lo. Kan damsung caan ahhin Pathian ti lungawi dingmi hi kan hmuitin dingmi sawn cu asi. Pathian ti lungawinak in nun lungawinak khal ara. 
 
Nun diriam le lungawinak nun neih ding ahcun zumlotupawl thawn kan tehkhin awknak pawl kan colhsan a tul. Cun, Jesuh Khrih ah kan sinak ngaingai kan fiang ih amah thawn kan pehzomnak sawn ah nun lungawinak kan hmu. Jesuh Khrih ih thuhla theih siloin, Amah rori kan nunnak ih ton ih pehzom ngah hi nun lungawinak asi. 

Happy Birthday Van Za Nunu!!!

 Happy Birthday Van Za Nunu!!! 

Tuini na birthday ni, na thleng thei saal hi a sunglawi tukih Pathian in lo thlawsuah sinsin hramseh! Kan innsang hrang na sunglawi tuk! 

Kum 2022, May 29 ah kan nei aw. Himi lai caan hi covid sal ihsin kan luat thok kum asi. Leitlun khal a har zet laifang caan asi. Kan neihawk ihsin Pathian in mangbangza in lam in hruai. 

Tu ah, kan nupa ih kan phuu lomi, Pathian thlawsuah sunglawi Van Za Lian, Pathian in laksawng in pe. Pathian in kan sungkua in thlawsuah tukih a thlawsuah dil bet ding tla kan hmaisong theu.

Kan nupa in Pathian in, a cawm rorin in cawm timi ka ruah tinten ka lungzur theu. Pathian hi kan ziangkim ih kan ziangkim ngaingai asi. Harsat caan ih bawmtu naibik hi Pathian arak si ngaingai. 

Ka thlawsuah donmi lakah "Van Za Nunu" hi, thlawsuah sunglawi hleice asi. Amah thawn kan neihawk ihsin nu-pa ih a thupitnak le innsang pabik dinhmun ih a sullam pawl ka theifiang ngah. 

Van Za Lian a suah ihsin Pathian ih in duhdawtnak a thuukzia a hnen ihsin ka zir ngah. Cun, Van Za Nu hnen ihsin awkam neem hman ding timi ka zir ngah. Cule, Ka hnen ihsi cun fate le nupi hrang zohthimtlak ih nun ding timi ka zirh-aw ngah. 

Ziangasikhalle, Van Za Nu kan pafa in, Van Za thawn kan lo duhdawt tuk! Happy Birthday ka Duat! Pathian in lo thlawsuah seh! 

Maw Ka Fahniang Van Za Lian - Happy Birthday!!!

 Maw Ka Fahniang Van Za Lian - Happy Birthday!!!

Bawipai I duhdawtnak cu,

Ka fapa ka duhdawtnak in ka fiang

Lungawi dingin I tuah ṭul maw

A pa ka sinak I theifiang maw

Phut mi ziang ka nei

Maw ka Fahniang!

I theihfiang ding ka hngak

A pa ka sinak te lawng

A pa in ka duhdawt timi

A pa in ka neh lo timi

A pa in ka ngai timi

Maw ka Fahniang!

A thaw-thawt ka siar

Bawipa in a kilveng

Kei in ziang ka tuah

Bawipa in minung a tuah

Ka Fapa a sem tir

Maw ka Fahniang!

Kannih cu miphun dang

Pathian ih miphun

Danglam dingih ser

Khristian innsang

Thlacam a thiam

Maw ka Fahniang!

A nu in nitin a um

A nui nun mawi a thlun

Anka mawi a zirh

Kei cun ka ruat

Seherhnak thawn

Maw ka Fahniang!

Leitlun danglam ah a suak

A borhbah zomi leitlun

Technology in a rak hmuak

Kan sianglo santiluan

Tuksumza a zawh dingmi

Maw ka Fahniang!

A laihri ka tan

Ka cawi

A ṭap

Ka hni

Ka khur

Maw Ka Fahniang!

Jeremiah Ih Pathian A Rinsan Daan Zia

Jeremiah cu Pathian in kum note asi lai ah Pathian ṭongkam simsuaktu dingah a hril. A ṭhukṭhun zet nan Pathian ih kawhnak el a theih lo.

Judah mipipawl Jerusalem ih um pawl in pathian dang an biaknak ihsin kirsal dingah Pathian hrangah a ding. Asinan, hmuhsuah le kaihhremnak tiang a tuarin Judah mipipawl le Jerusalem mipipawl cun Pathian thu an lung duh lo.

Jeremiah ih a nun hngetzia le Pathian thawn an pehparawknak

Pathian ih a tongkam khat khal ka thei ih ka ruat (Je. 15)

Capoh hnihsuak sainak ah ka tel lo (Je. 15)

Pathian ka lo duhzia khal na thei (Je. 12)

Nupi nei hlah aw, na fa na tah ding ka lo siang lo (Je.6)

A netnak ah Pathian cun ka mipi pawl in theih ringringnak dingah an thinlung sungah ka daan ka ngan ding ih, a hramhram in ka daan an thlun nawnlo dingih tuah duhnak lungthin thawn in thlun ding tiah (Je. 31:33) a sim. Cun, ziangtlukin Judah mipipawl sual hmansehla Pathian in, a duhdawtzia le an hrang Pathian asi duh ringring thu Pathian Amah rori in a sim (Je. 32:39).

Hril Dingmi Lamzin Pahnih

Lamzin pahnih a um hmanah, feh-kop a theih lo ruangah lamzin pakhat lawng kan hril a tul. Bawi pahnih rian a theih lo vekin, tuu le mee khal kumkhua an um kop theilo (Matt. 6:24, Matt. 25:32-33). 

 

Lung parih inn a saktu maw, vunnel parih inn a saktu saw kan si timi kan zohawk fel a tul. Ruahlopin, millian pa he

ll ih arak thlen vekin kan ralrin lo laiah kannih khal kan cemnetnak ah thleng thei ringring dinhmun ah kan ding ve asi.    

 

A fiakmi lamzin zawhtu mi an mal nan kumkhua nunnak asi. Asinan, a kaumi lamzin cu kumkhua siatralnak asi timi (Matt. 7:13-14) sungah kan hmu.  Jesuh in Israel daan thiam pawl, Farasi le biaknak hotupawl cu lamzin kau ih fehtupawl a ti. Ziangahtile, an um daan, an rah pawl Jesuh in a zoh tikah lenglam sunlawinak, leenglam biaknak lawng a thluntu an si thu a sim (Matt. 7:15-20). 

 

Lamzin kau ih a fehtupawl cu; thuthangthat zuarih dinhmun tha co tumtu, lenglam langnak lawng thupi ih rettu le Jesuh pehzom loin minung tuahcawp daan le duun a thluntupawl an si. (Matt 23:27). Pathian thawn pehparawknak an rak nei lo. 

 

Lamzin te ih a fehtupawl cu, Jesuh zirhtirmi thluntu, Pathian thu vekih a nungtu, Pathian a bia ih a riantu, a rinsantu le sal vekih Pathian hnenih tlulutawtupawl an si. Cucu lamzin dik, lamzin te asinan a dik le a hmanmi lamzin asi fawn (Acts 19:9,23). 

 

Jesuh a tlaihsan ih a nungtu le Jesuh lamzin ih a fehtupawl cu lamzin te ih fehtu an siih kumkhua in an nung ding (John 14:6). Lamzin te ih feh cun harsatnak, huatnak le buainak a phunphun an tuar nan Jesuh ruang ih tuar an si ruangah an hmailam cu a eng mawi asi.  

 

Lamzin te ih feh cu, Pathian hnenih tuhlutawknak nun asi. Pathian hrangih sal tuan asi. Pathian hrangih rinum zetih um asi. Hremnak le zohtleunak a phunphun khal a um ding; Jesuh khalih arak tuar zomi asi (John 15:18-19). Jesuh cu lamzin a si vekin amah zoh ih kan feh ahcun, amah thawn kan fehtlang sung cu lamzin fiak le dik ah kan feh tinak asi. 

 

Jesuh lamzin a thluntu cu lung parih inn a saktu an siih harsatnak le buainak an ton caan khalah lungawi ten an hmailam ih a hmuh lai dingmi sunglawinak zoh in hnget zetin an ding.  

Thuthangtha Dang A Um Lo | Uk Lian

Minung ih a theihzomi thuthangṭha hmuahhmuah lakih ropi le nasabik thuthangṭha cu Jesuh Khrih in, kumkhua thihnak ihsin kumkhua nunnakah in runsuak zo timi thuthangṭha hi asi. Pathian ih in zangfahnak rori ruangah Jesuh Khrih cu kumkhua kan nun theinak dingah kan aiawh ah a thi. Kan tuahveknak le, kan tawlrelbomnak tel riai loin a zangfahnak liolio ruangah rundammi kan si timi hi, thuthangṭha ngaingai cu asi (Eph. 2:8-9).

 

Pathian ih in rundamnak hi lei pian hlan ihsin, Pathian ih arak timtuahciami asi. In rundamnak hi a pekih in pekmi runsuahnak laksawng sunglawibik asi. Curuangah Paul in, Galatipawl ca a kuat tikah “Thuthangṭha Dang A Um Lo” tiah a sim hai. Kan hrangah zangfahnak thuthangṭha siarlo thuthangṭha dang a um thei ding maw si! (Gala.1:6-10). Zovek khalin, vancungmi khalin thuthangṭha dang an phuang pang asile camsiat an si ding timi (Gala. 1:8) ah kan hmu thei asi. 

 

Nitin, Pathian kan zumnak ihsin tlansuak ih pial-hlo dingah a phunphun in Setan pa cun in zawl ringring. Paul in Galatipawl ca a kuatnak san khal, rundamnak thuthangṭha zum dingah Judah daan nan thlun a tul tivekin Pathian thuthangṭha dang an phuan ruangih a kuatmi asi. Cuvekin, Pathian thuthangṭha hnakih thupisawn ih ruah dingmi thil, leitlun ah nitin hmuh ding a um. Asinan, Pathian zangfahnak thuthangṭha hnongin thuthangṭha dang; minung ih Pathian biak tlon lungawi tumnak le Pathian zangfahnak thuthangṭha hnakih uarmi dang kan neih ahcun camsiat kan si ve ding asi.

 

Kannih zumtu hrang ahcun kan thuthangṭhat cu misual rori Jesuh thihnak ruangah midingfel kan sinak hi asi (2 Cor. 5:21). Pathian hmaiah mithi asi zo hnu, in nung tersal hi Pathian ih zangfahnak sangbik asi (Rom 5:23). Pathian in, in rundamsalnak hi Jesuh Khrih hmangin thinglamtah parah “Ka ṭheh zo” tiin in tuahfelsak zomi asi (John 19:28-30). Kannih Pathian nung zumtupawl cu Pathian ih tuahzomi zumtupawl kan si vekin, a tuah lai dingmi zumtu le rinsantu khal kan si. 

 

Jesuh Khrih rundamnak thuthangṭha zum cu kumkhua nunnak asi (John 3:16). Jesuh zum hi kan vankai theinak tawhfung cu asi (Acts 16:31). Pathian ih in rundamnak hi, zum duh loin dung kan tolhsal le kan kirsal asile, Pathian ih laksawng Jesuh pom duhlotu kan si tinak asi. Jesuh zumnak ihsin kan kirsal pang asile, Pathian ih a tuahzomi zumlotu ah kan cang tinak khal asi.

 

Hi leitlun ah khualtlawng ih um kan si. Kan khualtlawnnak ahcun kan caam rei lo ding. Zumtu khualtlawng kan sinak san cu, kan kumkhua inn pan ih feh rero kan si ruangah asi. Kan van-inn lam pan ih feh kan sivekin, kan Bawipa Jesuh Khrih arat salnak ding thu in hnemaw ding kan siih, kan ruahsanbik dinngmi khal ni netabik ni asi. Kan riahsiat le thinhar caan khalah Pathian ih in rundamnak thuthangṭtha hi kan ruah camcin dingmi asi.  

 

 

Kan pabik Abraham cun Pathian thu hi a rinsan ih a zum khal a zum ngam. Cui’h, a zumnak ruangah Pathian in midingfel ah a cohlang asi (Gen. 15:6). Kan zummi rundamnak thuthangṭha hi, zangfahnak thuthangṭha asi. Kannih cu, zangfahmi, ngaidammi kan si. Ngaidamnak cu Jesuh ruangah kan ngah. Pathian hrangih kan tuahnak ruangah le, kan pumpekawknak ruangah siloin, Jesuh Khrih in tlennak thuthangṭha kan zumnak ruangah van kai dingmi kan si. 

 

Kan lungawinak ding bik cu, Pathian ih in tlennak thuthangṭha kan cohlan ruangah kan hmin cu nunnak cabu sungah ngan asi. Himi ruangah lungawi camcin ding kan si (Luk 10:20). Ngaidamnak thuthuthangṭha ruangah, kannih cu Pathian fa kan siih, kan pabik cu in rundamtu Pathian kan Bawipa Jesuh asi.

Zumnak Nung (Living Faith) - Uk Lian

“Ka zumnak a caklo”, “ka zumnak a mal” kan ti ṭheu nan, asile Pathian a um lo ti’n ruat hnik aw ti aw sehla, kan ngam cuanglo lala. Pathian kan rinsan ih kan zumzia cu, Pathian a um lo ti’n kan ruah ngamlonak in a fiang. Ziangahtile, Pathian a umdaanzia cu hliah ṭul loin, kan nunnak ah Pathian ih in kaihhruai daanzia tontehnak a phunphun kan nei zo.

 

Cathianghlim sungih zumnak kan timi (faith) cu, zum (believe) menmen vek siloin, rinsannak le pumpeknak a telmi (faith) zumnak asi. Cumicu, Jesuh Khrih thuthangṭha kan theihnak ihsin arami thu, kan theihfengmi Jesuh ih thu asi (Rom 10:17). 

 

Inn tum pipipawl hi, zo-in a sak timi kan thei lo nan, asaktu cu a um timi kan theih vekin, Pathian cu mit rorin minung kan hmuh vekin kan hmu theilo nan, a tuahmi ruangah Pathian a um; Pathian cu rinsantlak asi timi fiangte’n kan thei. Curuangah Amah hnenah zum hngetnak le ruahsannak khal kan nei; hmuhlomi Pathian nung zum ih rinsantu khal kan si (Heb 11:1). 

 

Khawsiapawl khalin, Pathian a um timi cu an zum asinan Jesuh Khrih hrangah pumpeknak le rinsannak an nei lo (James 2:19). Asinan, kannih Pathian nung zumtupawl cun, kan hmuhlomi Pathian nung kan zum ruangah zumnak in kan feh (2Cor 5:7). Ziangatile, zumnak thawn lo cun Pathian lungawiter a theih lo (Heb 11:6). Curuangah, Khrih ih a tlenciamipawl cu midingfel kan si vekin, Pathian rinsanak, zumnak le a hrang pumpeknak thawn a nungmi kan si (Rom 1:17). 

 

OT ah Pathian zum hnget tampi lakih langsarzual tla cu; Abraham mai’h sungsuak fapa rori Pathian a zum sawn tuk ruangih Pathian hnenih pe ngam. Noah at-hlawh ih Pathian zum ngam, Daniel thih ngam ih Pathian rinsan, Moses zumnak thawn tipi sen tansuak ngamtu, David a raal hnakih Pathian zumnak tuumsawn ih hmutu, Esther thihtheinak lakih Pathian tlaihsantu, Elijah zumnak thawn Baal prophet 450 do ngamtupawl ih an zumnak hi a va nasa ve! 

 

NT khalah Jesuh hnenih zumnak nung nei tampi kan hmu. An zumnak kham ih kham theih lo an si. Mitcaw pahnih in Jesuh an ko, an kham nan, Jesuh in in tidam thei ti an theih ruangah kham an theihlo, an ko ciamco ih Jesuh in an mit a vaan ter ngaingai (Matt 9:27-30). Zumnak hi a va sunglawi ve! Mitcaw Bartima khal cuvek thotho in Jesuh a ko, Jesuh in a mit a vaangter ngaingai (Mark 10:47). Kum 12 sung thipuut nu khal, Jesuh ih puan zikte a dai asile a dam dingah zumnak a nei ih a dai hnu ah a dam rori ngai (Matt. 9:20-22). 

 

Zumnak hi, kan taksa kan thu-nun vekih thu-nun ding asi. Pathian kan zum tam asile, kan parah Pathian thiltitheinak a lang tam ding tinak asi. Curuangah kan zumnak, Jesuh Khrih thu pawl, Pathian ih duhnakpawl tamsin thei ih thluntu kan si ding hi Pathian ih in duhsakmi asi. Kannih, Pathian ih midengfel tiih kawhmi pawl hi, kan nitin nunnak ah Pathian nung zum hngetnak thawn dingfel ten nung ding kan si.